කොටියකු පුදුම සහගත ආකාරයෙන් ඉම්පාලා මුවකු දඩයම් කරන ආකාරය බොස්වානාහි මොරෙමි ජාතික වනෝද්‍යානයේ දී ඡායාරූපයට නැගීමට වනජීවී ඡායාරූප ශිල්පියකු සමත්වී තිබේ.
ඇමෙරිකාවේ ලාස් වේගාස්හි පදිංචි යස්මින් ටාජික් මේ දර්ශනය ඡායාරූපයට නගා ඇත.
කොටියෙක් මෙවැනි දඩයමක් කරන ආකාරය වාර්තා වූ පළමු අවස්ථාව මෙය විය හැකියැයි පරිසරවේදීහු කියති.
අඩි හතලිහක් පමණ උසැති ගසක් මුදුනේ කොටියා විවේක සුවයෙන් රැඳී සිටියි. තණ කමින් ඒ ගස අසළට පැමිණෙන ඉම්පාලා මුවන් රංචුවකි. මේ මුවන් රංචුව දකින කොටියා හොඳින් වැඩුණු මුවකු දෙස බලා ගසේ සිට හිටි හැටියේ බිමට පනින්නේ ඒ මුවාගේ පිට මතටය. ඡායාරූප ශිල්පියා පවසන්නේ කොටියා ගසෙන් බහින්නේ නැතිව කෙලින්ම මුවා මතට පැන්න බවයි. එය ඔහුගේ ඡායාරූපවල ද පැහැදිලිව පෙනෙන්නට තිබේ.
හදිසියේම උඩින් පහත්වූ කොටියා එක් මුවකු ගොදුරු වෙද්දී අනිත් මුවෝ හිස් ලූ ලූ අත දිවයති. මොහොතකින් තම මුඛයේ උල් දත් අතර මුවාගේ ගෙල තදින් රඳවා ගන්නා කොටිය ගස මතට නැග ගනී. මේ මුවා කොටියාගේ දිවා ආහාරය බවට පත්වූ බව ටාජික් පවසයි.
Comments
Post a Comment